ورق طعمية

ورق الطعمية اللي تعرفه هو اللي بيتلف فيه الطعمية .. ده شئ بديهي ومعروف

أما ورق الطعمية التاني فده اللي بيتلف ويتحط في جيبك ، وعلشان نعرف نفرق بينهم بنسمي التاني جنيه مصري

الفلوس في مصر بقت زي ورق الطعمية في كل حاجة ، بل بالعكس ورق الطعمية بقى ليه قيمة وانظف منها كمان
الجنيه ملوش قيمة دلوقتي ، تقدر تقولي ممكن تشتري ايه بالجنيه الملفوف في جيب سيادتك ؟ وخلي بالك اننا كدا حفظنا له قيمته بلفظ – ملفوف – لانه في الغالب بيكون مكرمش ومرمي و متني لانه خلاص مبقاش ليه شكل علشان يتلف واللا يتفرد
!
وبالرغم من القيمة الدونية للجنيه تيجي تطلب فكة من اي حد تفاجئ بإن في أزمة فكة في البلد وان الفكة اتسحبت من السوق
معاك فكة جنيه يا حج ؟ بدون تفكير الجواب جاهز لاني كده بسأل عن شئ مستحيل يكون موجود لاننا عندنا ازمة فكة

فيرد بسرعة ويهز راسه لأ
طيب لو اشتريت من عند الراجل ده اي حاجه بفرض انه صاحب محل ، طبعا كده الفكة تظهر ... صحيح فرج ربنا قريب

من فترة مش طويلة كانت فكة المئة جنيه مشكلة لما تطلعها لاي حد يبصلك ويبتسم في سخرية شديدة وكانه بيقولك هتتمنظر عليا يا ..... ويديلك ضهره ويقولك فك .. مفيش فكة ، دلوقتي بقت الخمسة جنيه مشكلة وبتبقى عارف قبل ما تطلعها من جيبك انك هتتسأل سؤال وجيه وهو بياخدها منك، مفيش فكة ؟؟
..وعلى مضض يفكهالك

المصريين بيعتبروا الفكة ثروة قومية
كل واحد عايز – يكوش – على الفكة اللي في البلد، ده الطبيعي يا جماعة ما احنا اللي بنعمل كده في نفسنا ، لما انا وانت وهي منرضاش نفك جنيه .. جنيه اللي هو يعني ابسط حاجة يبقى هتحس ان الفكة دي شئ غالي اوي

!!ويا سلام لو وقع في ايدي الكنز اللي اسمه فكة ده ده انا هأذل الناس ومش هفك لحد خالص
!!باشا بقى ومعايا فكة

طيب نشوف وجه تاني لورقة الطعمية اللي بنتكلم عنها دي

البنك المركزي مصِر اصرار عجيب على انك تشم عبق التاريخ وانت ماسك الجنية
عايز يخليك تعيش احساس انك في بلد تاريخيه ، الفلوس بتتداول فيها من آلاف السنين وان الجنيه اللي في ايدك ده اثري مسكه الفلاح ومسكه الباشا علشان كده بقى بالحال اللي انت شايفه عليه ده ... كتر خيره الصراحة

وطبعا واجبك كراجل وطني بتقدس التاريخ والاثار المصرية انك – ترمم – الجنيه ده فلو شفته مقطوع من النص من الثنية بتاعه تباع الاتوبيس وللا الميكروباص يبقى تجيب شويه اسمنت قصدي لزق وتلعب لعبه قص ولزق على الجنيه الأثري

وطبعا لانك مش خبير في عمليات الترميم فمحدش هياخد منك الجنيه وهيقع في اربيزك

تروح البنك وانت طامع انك هتسحب فلوس جديدة بقى – بترن – تلاقي واحد خبير شويه عنك في الترميم قدر يصرف الجنيه بتاعه وأخد دورته في جميع انحاء الجمهورية ولف ورجع لخزنة البنك – وطبعا لانها حكومة بتقدس الاثار – فمش هتعدم الجنيه ده وتجيب غيره ، لأ ، هتديهولك وهي حاسه انها بتهاديك بأحد آثار مصر اللا فرعونية .
تاخده وانت ساكت وتلفه في جيبك وتطلع على أقرب محل طعمية تديه للراجل باليمين عشان يديك ورقه ملفوف فيها قرصين طعمية بالشمال
::